ECONOMIA VERONESE | lunedì 25 marzo 2019 03:30

Cerca nel web

ECONOMIA VERONESE | 04 marzo 2019, 17:58

489° Carnevàl de Verona, 1° de màrso 2019. Salùdo al sindaco de Verona, Federico Sboarina, ‘n Muniçìpio, da parte de le Màscare veronesi, ‘n ócasión del “Vènàrdi gnòcolàr”.

Nó pódéa passàr l’ultimo vènàrdi – ciamàdo, dai veronesi, “gnòcolàr” – del gran Carnevàl de Verona, sènsa che le Màscare veronesi le fùsse ‘ndàde a saludàr ‘l siór Sindaco. Par questo, àle diéze e mèza del 1° de màrso, dómiladìsnóve, tùto ‘l Carnevàl veronese ­– guidà dal “Papà del Gnòco”, có’ tanto de capél, fàto a tór, gran barba bianca e mantèl rósso – ‘l s’a tróvà néla Sala dei Aràssi, ‘n Muniçìpio, e l’è sta récevù dal sindaco, Federico Sboarina, e da l’assessór àle Manifestassióne, Filippo Prando. L’a ‘ntródóto l’encóntro ‘l presidente del Comitàto del Carnevàl - Bacanàl del Gnòco, Verona, Valerio Corradi – che, bisògna dìrlo, ‘l sé dà ‘n gran da fàr! – presente ànca Andrea Perina, del Dirétivo carnevalesco. Corradi ‘l s’a dìto contento che Verona la g’àbia ‘n sì gran Carneval e l’a saludà ufìssialmente ‘l Sindaco e ‘l l’a ànca réngrassià par l’inportante cólaborassión, che ‘l Comune ‘l ghé dà al Carnevàl.

489° Carnevàl de Verona, 1° de màrso 2019. Salùdo al sindaco de Verona, Federico Sboarina, ‘n Muniçìpio, da parte de le Màscare veronesi, ‘n ócasión del “Vènàrdi gnòcolàr”.


El Sindaco l’a esprèsso gran sodisfassión, par l’encóntro, disèndose cónpiasù del Carnevàl veronese, che ‘l ànema, có’ ccpassión, la çità, ‘l ralégra grandi e pìcoli e che l’è fàto – rilievo ‘nportante –“da çitadìni, che, ‘mpégnàndose gratis, i pòrta alégrìa a altri çitadìni…!” Néla Sala dei Aràssi, gh’éra presènti trentasié Màscare çitadine difarènti, de vintiùn Comitati de Verona, che, có’ altre màscare, provegnènti dàla provincia, i-éra, prèsso póco, ‘n sessantaçìnque… Tanti cólori, tanta storia, tradissióne e gran amicìssia, tùto, par ‘na più bèla, vìva Verona e par beneficènsa! Fénìdo l’encóntro, le sióre Mòscare i-è ‘ndàde in Bra, par scóminçiàr la gran sfilàda del quatroçèntootantanóvésimo “Vènàrdi gnòcolàr”, 1° de màrso 2019! Che “gnòcolàr” ‘l sé ciàma cusì, l’è parché, ‘n sto giórno, a Verona, s’a sempre magnà i “gnòchi” – ‘n ‘taliàn “gnocchi” – fàti có’ ‘n inpasto de farina e patate, e còti ‘n àqua bóiènte… ‘Na vòlta, scólàdi e cóndìdi có’ butiér o có’ sùgo de carne e formàio…, i végnèa e i vién servidi, ànca al giorno de ancó’, cómpagnàdi da bòni gòti de vìn…‘N sóma, ‘n piàto tradissiónàl e particolàr dei veronesi… ‘N ócasión de l’ultimo vènàrdi de carnevàl,’l Papà del Gnòco, capo de ‘na mascaràda benefica e có’ ’l só’ regno efìmaro nel Quartiér de San Zén – ‘l scrìve Beltramini – el distribuiva farina, patate, butiér e legna, o gnòchi, zà cóndìdi, àle faméie bisognóse del rìón, en esecussión del làssito, fàto da Tommaso da Vico…, dótór de médissìna e filosofo, atìvo a San Zén, Verona, nei àni Trenta del Mileçinqueçènto. S’a tratà, dónca, de ‘na bèla manifestassión, che l’a dèmóstrà, come ‘l Carnevàl ‘l sia sì alegrìa e gran animassión, par Verona, ma, ànca réspèto par le Idstitussióne, e vólontà de fàr del bèn.

Pierantonio Braggio







Pierantonio Braggio

Ti potrebbero interessare anche:
Prima Pagina|Archivio|Redazione|Invia un Comunicato Stampa|Pubblicità|Scrivi al Direttore